Gikulata maong iyang gipatay

CEBU - Gitabangan og kulata ang 17-anyos nga suspek maong iyang gipangdunggab ang duha ka batan-on diin ang usa patay sulod sa diskohan sa sitio Cabulihan barangay Ilihan siyudad sa Toledo niadtong Domingo sa kaadlawon.

Mao kini gipadayag sa menor de edad nga suspek kauban ang iyang inahan atol nga boluntaryong mitahan sa iyang kaugalingon sa kapulisan sa lungsod sa Argao kagahapon sa alas 12:40 sa kaadlawon.

Matud ni SPO1 Arnold Abiner, imbestigador sa Argao Police dihang nahinabi sa Banat News mibutyag nga may daghang bun-og sa lawas ang suspek dihang mitahan sa ilang buhatan.

Gikatahong human siya kulataha mipauli ang suspek ug mikuha og kutsilyo dayong balik sa diskohan ug gibawsan ang duha.

Sa lungsod sa Argao mitahan ang suspek tungod sa kahadlok nga panimaslan sa mga kabanay sa biktima kun adto mosurender sa Toledo City Police.

Hinuon ang kapulisan sa Toledo nga daling napahibawo sa pagtahan sa suspek dali dayon kining nagpadala og mga polis nga pinangulohan ni PO3 Jamilon Cotmaya aron pagkuha kaniya aron pasakaan og kaso ug i-turn-over sa DSWD.

Ang napatay mao sila si Randy Casayas kinsa naigo sa dughan pagdunggab samtang nalandig sa tambalanan ang kauban niining si Fel Mercader nga nadunggaban sa bukobuko ug abaga.  (BANAT NEWS)