'Shoot to kill' order batok sa killer samabdos - Malazarte

CEBU - Ang kapolisan sa dakbayan sa Naga andam nang moluwat og “shoot to kill order” batok sa tulo ka kriminal nga mipatay sa usa ka babayeng mabdos niadtong milabay’ng semana didto sa barangay Cabungahan, dakbayan sa Naga.

Kini samtang gipasalig sa mga otoridad nga siguroon nila nga dili pa matapos ang buwan sa Decembre madakpan na nila ang maong mga suspetsado.

Apan ang hepe sa kapolisan sa dakbayan sa Naga Supt. Renato Malazarte mibutyag sa Banat News nga moluwat gyud siya og shoot to kill order kay armado ang maong mga kriminal.

May posibilidad nga mosukol kini sa mga otoridad sa higayong maapiki na sila ug wala nay kadaganan.

Kini tungod kay gipalihok na ni Malazarte ang ilang tanang mga intelligence group apil pa ang mga Barangay Intelligence Network (BIN) ug mga tanod aron dakpon patay kon buhi sila si Ronald Paunil, Bernardino Gentica, ug Edgar Bacus.

Matud pa ni Malazarte nga dako ang iyang pagtuo nga ang tulo ka mga suspetsado naa ra magtago-tago sa kabukiran sa Cabungahan ug posibling gipanalipdan sila sa ilang mga supporter .

Giklaro usab niya nga dili siya magmakuli sa pagluwat og shoot to kill order batok sa tulo kay aduna siya’y katungod sa pagpatuman sa balaod.

Matud pa ni Malazarte nga dili kakompiyansahan ang mga suspetsado gumikan kay aduna kini tag-as nga armas ug lisod na kaayo kun hiunhan ang mga otoridad.

Midugang si Malazarte nga bisan kun walay time-table nga gihatag si Sr. Supt. Carmelo Valmoria ug Mayor Valdemar Chiong alang sa pagdakop sa maong mga kriminal, apan ilang paninguhaon nga madakpan kini karong tuiga.

Nasayran nga ang nagsabak og duha ka buwan nga si Lani Lapis namatay dihang nasabak kini sa mga saag nga bala atol sa pagpinusilay sa tulo ka mga kriminal kinsa supporter ni kanhi kapitan Epifanio Gentica batok sa mga bata-bata sa kasamtangang barangay captain Federico Cabesares .

Gituohan sa kapolisan nga bangi sa politika maoy nagpaluyo sa maong pinusilay.  (BANAT NEWS)