P100 kada pirma pag-recall ni Soc

CEBU - Kanhi kandidato sa pagka-mayor sa dakbayan sa Talisay Johnny delos Reyes (JVR) mihimakak sa mga pasangil nga siya ang namayad og P100 ngadto sa mga tawo aron lang mopirma pagpa-recall kang Mayor Socrates Fernandez.

Gikataho nga si delos Reyes giingong namayad ngadto sa taga barangay Manipis ug sa barangay San Roque aron lang mopirma sa nahisgutang porma.

Dunay mga report nga nikatap diha sa mga text messages kabahin sa giingong kalihukan diha sa Manipis ug sa San Roque apan kusganon kining gipanghimakak ni delos Reyes.

Apan si Delos Reyes mipasabot sa mga tigbalita nga sa milabay’ng semana miadto ang iyang grupo sa Manipis nahitabo lang nga dunay namatyan nga ilang natunulan og P100 ug sa ila nang paglakaw dunay tawong nangayo og tabang kay walay ikapalit og pagkaon sa iyang pamilya maong ila kining gitagaan og P100.

Apan sa impormasyong mikatap gikatahong gilingla ni Delos Reyes ang maong mga tawo pagpapirma sa porma sa recall ug kini kusganong gihimakak sa naulahi tungod kay diha sa ibabaw sa maong porma nakabutang ang basehanan.

Ang nabutang sa porma mao ang “loss of confidence due to grave abuse of authority, obstruction of justice and conduct unbecoming of a government official” isip basehanan sa recall, ug kabubut-on na sa mga tawo kung pirmahan nila kini.

Nagduda silang dunay laing grupo ang nagpahigayon usab og signature campaign ug maoy milingla sa mga tawo ug sila maoy napasanginlan.

Sa milabay’ng adlaw ang kapitan sa Manipis nga si Joselito Laurente ang mikumpiskar og 28 ka porma sa recall form tungod kay dili mao ang pagpasabot ngadto sa iyang molupyo ug base sa taho ang maong porma gitugyan niya kini ngadto kang Mayor Fernandez.

Mibahad si Delos Reyes nga modangop sa Commission on Election kabahin sa maong insidente ug hayan mopasaka sila og kaso kang Laurente ngadto sa Ombudsman.

Si Laurente sa pakighinabi niini sa Banat News kagahapon sa hapon mipasangil nga pangilad ang gibuhat sa grupo ni JVR tungod kay ang gisulti niini ngadto sa mga tawo nga survey ang ilang gipahigayon kung uyon ba ang mga tawo nga modagan siya isip mayor sa dakbayan karong umaabot 2010.  (BANAT NEWS)