20-anyos gipusil, gitigbas

CEBU - Patay diha-diha ang usa ka 20-anyos nga lalaki kinsa gipasanginlang nalambigit sa mga nahitabong tulis ug pagpangawat sa dakbayan sa Talisay human kini pusila ug gitigbas sa duha ka wala mailhing mga lalaki niadtong Domingo sa gabii diha sa dalan Coles, duol sa tulay sa Mananga, barangay Tabunok sa nahisgutang siyudad.

Ang biktima mao si Jamil Sarif alyas “ Junjun Muslim”, residente sa maong lugar kinsa nakaangkon og samad tinigbasan sa agtang, samad pinusilan sa dughan, walang kamot ug usa sa likod nga bahin sa ulo.

Ang biktima daling gidala sa mga mirespondeng polis ngadto sa Talisay City District Hospital apan wala na kini makaabot nga buhi sa maong tambalanan.

Base sa imbestigasyon sa mga polis nga ang mga paryente ni Sarif natahap nga sakop sa vigilante ang mipatay sa biktima.

Si PO2 Roelito Tano sa Theft and Robbery section ug PO1 Jundave David sa homicide section kinsa maoy miresponde sa nahisutang hitabo mibutyag sa Banat News nga si Jamil nalambigit sa mga kasong robbery sa dakbayan.

Napriso na kini sa Talisay City Jail ug sayo niining tuiga lang nakagawas gikan sa maong prisohan.

Base sa imbestigasyon sa kapolisan sayo sa nahisgutang adlaw sa wala pa mahitabo ang insidente duha ka wala mailhing mga lalaki ang mianha sa lugar ug nangita sa biktima. (Brenda Batuto) (BANAT NEWS)