Gipatay sa disko

Usa ang patay ug laing usa ang kritikal ang kahimtang human gipangdunggab sa usa ka 17-anyos nga batan-ong lalaki sulod sa diskohan atol sa kapistahan sa sitio Cabulihan, barangay Ilihan siyudad sa Toledo kagahapon sa alas 2:00 sa kaadlawon.

Ang biktima nga nahagba sulod sa diskohan ug namatay mao si Randy Casayas, ug ang naangol usab ug naa sa kritikal nga kahimtang mao ang laing batan-on nga si Fel Prandas Mercader, 20, pulos molupyo sa nahisgutang lugar.

Samtang ang suspek mao ang usa ka 17-anyos nga lalaking molupyo sa sitio Proper Ilihan sa samang barangay kinsa gipangita pa hangtud ning pagsulat sa balita.

Matud ni PO1 Dante Hilo sa Toledo City Police dihang nahinabi sa Banat News, nagkalingaw ang mga biktima og sayaw dihang kalit gituparan sa suspek ug unang gidunggab si Mercader tulo ka higayon sa walang bahin sa abaga ug buko buko.

Pagkahuman gisunod niya og dunggab ang tupad nga si Casayas diha sa dughan kinsa dali usab nga nahagba.

Nagkatibuwaag sa pagpanagan paingon sa gawas ang mga tawo ug nakahigayon ang suspek sa pag-ikyas.

Ang mga biktima gidali pagdala sa Toledo City Hospital apan nakabsan sa kinabuhi si Casayas samtang gibalhin sa tambalanan sa Sugbu si Mercader tungod sa kagrabe sa igo niini.

Wala pa matino gihapon sa kapolisan ang motibo sa pagdunggab apan gituohang posibleng gisuyaan ang duha sa suspek.