LTO-7 'bombahan'

Buhatan sa Land Transportation Office (LTO-7) gihulga pinaagi sa text message nga paulbuhon unta sayo kagahapon sa buntag.

Si Sr. Supt. Patrocinio Comendador, hepe sa kapulisan sa Sugbu nikunpirmar sa mga tigbalita nga nakadawat og report si Supt. Marciano Batiancila, chief sa Traffic Divisions nga may hulgang bombahan ang nahisgutang buhatan.

Kini dihang si Arnel Tancinco, ang tsirman sa City Traffic Operation Management (CITOM) midangop kang Batiancila human may usa nila ka traffic enforcer ang nipadala sa nadawat niining text kabahin sa hulga diha sa maong buhatan.

Matud pa ni Comendador nga ang maong text nadawat niadtong Domingo ug gi-forward usab ni Tancinco ngadto kang Supt. Batiancila.

Nunot sa maong pagpanghulga, ang CCPO daling nipadalag mga tawo sa maong dapit aron masusi kini bisan pa man dako ang ilang pagtuo nga ang nagpadala sa maong text message gikan ra sa mga driver nga nasilo sa LTO-7 o ba kaha sa mga tawo nga adunay personal nga kasuko sa mga kawani sa maong buhatan.