Kilid nabuslot human gidunggab

CEBU - Usa   ka tawo kinsa mitubag sa sugo sa lawas sa likod sa ilang tindahan, wala makatiwas, dihang gidunggab kini sa iyang mga kontra didto sa barangay Poblacion, Danao City niadtong miaging gabii.

Ang biktima mao si Conrado Matugas Cabriana, 21, ulitawo nga taga F. Ralota street barangay Poblacion, Danao City, samtang ang mga suspetsado mao ang usa ka menor de edad nga nailhan lang sa ngalang Reymond, ug si Andreo Castillo, 18, ulitawo nga silingan ra usab sa biktima.

Hinuon si Reymond nadakpan dayon sa kapolisan sa maong dakbayan samtang si Castillo gipangita pa karon human kini mosibat.

Si PO1 Nelson Pantoja sa kapolisan sa maong dakbayan mitug-an sa Banat News nga igo lang nga nagtuman sa sugo sa lawas ang biktima luyo sa ilang tindahan dihang kalit lang kining gitabangan og dunggab sa mga suspek.

Si PO1 Pantoja kinsa natahap nga magkakontra ang biktima ug mga suspetsado midugang nga nakasibat gyud dayon ang duha ka mga suspek human sa pagpanunggab.

Apan sa gihimo nilang follow-up operation nasikop nila si Reymond uban sa batangas knife niini nga gituohan nilang maoy gigamit sa pagduslak ngadto sa biktima.

Apan si Castillo wala pa hisayri kun hain kini motago karon nga maoy gipanid-an sa kapolisan.

Ang biktima nga samdan sa bukobuko gihatod dayon ngadto sa   Danao District Hospital apan gibalhin kini sa Vicente Sotto Memorial Medical Center sa dakbayan sa Sugbu gumikan sa katalandugon sa kahimtang. (BANAT NEWS)