CEBU - Gitaroyan sa kutsilyo ang usa ka tawo nga gidunggab sa iyang silingan didto sa sitio Canumay, barangay Labogon, Mandaue City niadtong miaging gabii.
Si SPO1 Robert Hugo sa Mandaue City Police Office miila sa biktima nga si Ruel Concepcion, 30, ulitawo ug ang nakadunggab mao si Harriz Oporto, hingkod , ug pulos molupyo sa Canumay.
Si SPO2 Hugo mibutyag nga sa sayo pa, nag-inom og ilimnong makahubog ang biktima ug ang suspetsado dihang nagkalalis ang duha.
Ang suspetsado nga nawad-an og pailob milanit sa iyang kutsilyo ug kalit nga gihansak sa tiyan sa biktima.
Ang biktima nga wala magpraktis og self defense wala makasagang sa kutsilyo hinungdan nga nakataroy gyud kini sa tiyan sa biktima.
Gihatud dayon kini ngadto sa Vicente Sotto Memorial Medical Center sa dakbayan sa Sugbu samtang ang suspetsado mikagiw usab dayon ug hangtod karon wala pa hikit-i sa kapolisan. (BANAT NEWS)