Magsuon gipusil sa 'drive by shooting'

CEBU - Nalandig sa tambalanan ang duha ka managsuong lalaki human sila pamusila sa tulo ka wala hiilhing “drive by shooting” nga mga kriminal kagahapon sa kadlawon didto sa dalan Victoria, Barangay Tabunok, dakbayan sa Talisay.

Ang mga biktima giila sa mga polis nga sila si Marlon ug Roldan Racaza, hingkod, mga ulitawo, taga Victoria St., Tabunok.

Si Marlon, samaron sa ulo, samtang si Roldan samdan usab sa suwang ug tuong abaga.

Si PO2 Lino Diez sa homicide section sa Talisay City Police Station mibutyag sa Banat News nga ang mga biktima kauban sa ilang mga higala nga sila si Allan Buhat ug “Gwendolyn”, diha sa daplin sa karsada duol sa ilang balay samtang nagpaabot nga motuwak ang kusog kaayong bunok sa uwan dihang kalit lamang mibadhas ang usa ka motorsiklo nga gisakyan sa tulo ka wala hiilhing mga tawo.

Paghitungod niini sa nahimutangan sa mga biktima ug mga kauban, mipauwan dayon og bala nga maoy hinungdan sa pagkaigo sa managsuon, dayong sirit pahilayo sa lugar.

Gihatod dayon ang mga biktima ngadto sa Talisay District Hospital apan gibalhin kini ngadto sa Vicente Sotto Memorial Medical Center gumikan sa katalandugon sa ilang kahimtang.

Matud pa ni PO2 Diez nga bantayanan kining hitaboa basin nga laing grupo na usab kini sa drive by shooting nga mga kriminal nga walay laing trabaho gawas sa pagpaarak og mga bala kutob sa mga tawong magpundok-pundok daplin sa karsada panahon sa kagabhion.

Hinuon midugang siya nga padayon pa nila karong gi-follow-up ang maong hitabo. (BANAT NEWS)