Negosyanteng babaye gipusil patay

CEBU - Patay ang usa ka negosyanteng babaye human kini pusila sulod sa merkado publiko sa barangay Cansaga, lungsod sa Consolacion alas 6:00 pasado sa gabii niadtong Sabado.

Ang biktima mao si Dominga Villacroses, 35-anyos, minyo, taga barangay Pulpogan, usa ka meat vendor sa nahisgotang merkado.

Duha ka wala mailhing mga lalaki kinsa   kalit lang mitungha diha sa tindahan sa biktima kinsa nangutana pa sa presyo sa matag kilo sa gibaligya niining karneng baboy.

Ang maong mga kriminal ang padayon pa karong gipangita sa kapolisan.

Si SPO2 Rizalino Aligno nga nahinabi sa Banat News nagkanayon nga wala hilabti ang dakong kantidad sa kwarta nga halin sa tibuok adlaw nga pagpaninda ni Villacroses.

Dugang pa ni SPO2 Aligno nga sa pasiunang pakisusi nga ilang gihimo, maoy ilang nasuta nga dili tulis ang hinungdan sa pagpusil ngadto kangVillacroses.

Matud ni Aligno nga usa sa motibo nga ilang gitan-aw karon sa maong pagpamusil mao ang personal nga hinungdan

Ang kapolisan sa maong lungsod ang mipahigayon og follow-up nga imbestigasyon sa maong hitabo. (BANAT NEWS)