Vendors palibot sa presinto 5 hawanan

CEBU - Pahawanan na gikan sa mga manindahay sulod niining semanaha ang palibot diha sa Carbon Police Station 5 sa Cebu City Police Office (CCPO).

Ang City Market Administrator nga si Racquel Arce mihatag na og notisya ug nakighinabi na usab sa maapektuhang mga vendors.

Matud ni Arce nga ang pag-demolish sa mga structures agi og pagsanong usab sa hangyo sa bag-ong hepe sa nahisgutang presinto nga si Senior Inspector Pablo Cabildo.

Nagkanayon ang market administrator nga gipadangat ni Cabildo kaniya ang reklamo sa direktor sa Police Regional Office (PRO-7) nga si Chief Superintendent Ronald Roderos.

“Mao man kunoy reklamo sa regional director nga baho kaayo ang opisina sa kapolisan diha sa Carbon tungod sa nagpalibot niining mga vendors,” sumala ni Arce.

Kapin sa napulo ka mga structures nga anaa duol sa Carbon Police Station ang giingon ni Arce nga panggub-on sulod niining semanaha.

Nagkanayon hinuon si Arce nga dili mawad-an og kapanginabuhian ang apektadong mga manindahay tungod kay kini ibalhin sa laing pwesto.

Matud sa market administrator nga ang pabalhinon nga mga vendors hatagan og tagsa ka stall diha sa Unit 1 sa Carbon Public Market.

“Ato na silang hatagan og pwesto kay dili man pod ni sila mga badlongon, regular man nga muhatag sa ilang arkabala,” miingon si Arce.

Apan kun si Cebu City acting Mayor Michael Rama maoy pangutan-on, ang police station diha sa Carbon maoy angayan nga ibalhin.

Ang acting mayor nga maoy chairman sa Police Coordinating and Advisory Council (PCAC) una nang mipasalig pagtabang og pangita sa lugar nga kabalhinan.  (BANAT NEWS)