10-anyos gi-rape sa hilutungan

CEBU - Gilugos ang 10 anyos nga batang babaye sa 25 anyos nga kawani sa usa ka Korean restaurant.

Igo lang gisugo ang biktima pagpaapas sa suspek aron papauli-on apan giguyod na hinuon kini sa mingaw nga lugar ug gipahimuslan didto sa isla sa Hilutungan lungsod sa Cordova niadtong Sabado sa alas 6 sa gabii.

Ang biktima molupyo sa nahisgutang lugar samtang ang suspek mao si Kelvin Fernando, 25, boatman sa maong Korean restaurant ug nagpuyo gihapon sa maong dapit.

Matud ni PO3 Rolando Tagsip, desk officer sa Cordova Police Station subay usab sa inisyal nga imbestigasyon ni PO1 Melissa Tampus sa Womens Desk usa ka Rose nga maoy tag-iya sa gipuy-an nga balay sa suspek misugo sa biktima pagpa-apas sa suspek nga nagtrabaho sa Hans restaurant aron sultian kini nga miabot na ang iyang asawa gikan sa laing isla.

 Apan sa ilang pagpamauli kalit lang giguyod sa suspek ang biktima paingon sa mingaw ug tago nga lugar ug didto gi-among amongan ang biktima apan nabulilyaso ang maong linuog nga buhat human naghilak nga mipauli ang biktima ug misumbong sa nahitabo kaniya.

Daling gi-report ang maong panghitabo sa kapulisan ug nianang pagka alas 10 niadtong Sabado sa gabii gidala dayon ni PO1 Tampus ang biktima didto sa Vicente Sotto Memorial Hospital (VSMMC) aron ipakorasyon.

Samtang ang suspek boluntaryo usab dayon kining mitahan sa iyang kaugalingon ngadto sa barangay kagawad sa Hilutungan nga si Fedilino Arong kagahapon sa alas 6 sa buntag human kini makamatikod nga nabulabog ang iyang gibuhat sa bata ug nianang pagka alas 7 sa buntag gi-turn-over kini sa kapolisan.  (BANAT NEWS)