Mag-uuma gipusil sa armadong grupo

CEBU - Gipusil sa pundok sa mga lalaki nga armado ang usa ka mag-uuma nga igo lang gisuholan sa pagpasaka og lubi didto sa gi-ugmad niining umahan sa barangay Pawa lungsod sa Dumanjug niadtong Sabado sa alas 3 sa hapon.

Ang biktima nga naka-angkon og samad pinusilan sa iyang bukobuko mao si Albert Flores, 31, minyo ug pagpanguma ang trabaho nga molupyo sa nahisgutang lugar.

Samtang ang suspek mao ang grupo sa usa ka Rogelio Luab, Jicjic Omboy, Esmael Sanupao ug lain pang tulo ka kauban nila nga wala mailhi ang pangalan nga pulos hingkod ang panuigon ug mga molupyo sa susamang lugar.

Matud ni SPO1 Julianito Molejon sa Dumanjug Police Station sa dihang nahinabi sa Banat News subay sa blotter nga gibasehan niini ang biktima gisuholan sa tag-iya sa luna nga iyang gi-uma nga si Dolping Bauzon pagsaka sa mga lubi niini.

Apan kalit lang miabot ang grupo ni Luab ug gisinggitan ang biktima nga didto sa taas sa lubi niadtong tungora nga pakanaugon tungod kay dunay kauban nila nga gustong makig-istorya niya.

Apan sa dihang nanaog ang biktima paghiabot niini sa ubos nakit-an niini ang usa sa mga kauban ni Luab nga miibot sa giluklok niining armas hinungdan nga midagan siya pahilayo apan gipusil siya sulod sa duha ka higayon ug nakaangkon og samad pinusilan sa bukobuko.

Apan bisan og samaron ang biktima nakahimo pa gihapon kini og dagan sum-ok sa libon nga kasagbutan aron pagsalbar sa iyang kinabuhi ug wala na kini makit-i pa sa mga suspek nga dali usab nga misibat human sa hitabo.

Ang biktima gidala sa tambalanan nga nahimutang sa maong lungsod ug luwas na kini sa makuyaw nga kahimtang samtang ang kapolisan padayon pang nag-imbestigar pagtumbok sa motibo sa maong pagpamusil. (BANAT NEWS)