Nagwarawara sa armas tiklo

CEBU – Gidakop sa kapolisan ang usa ka negosyante kay nasakpan kining nagwara- wara sa iyang armas de fuego nga walay lisensya didto sa Sitio Upland, barangay Poblacion siyudad sa Danao niadtong Huwebes sa alas 6:10 sa gabii.

Ang suspetsado mao si Geraldo Armamento, 38, minyo, tag-iya og usa ka tindahan sa Sitio Mangitngit barangay Sandayong Norte sa nahisgutang siyudad.

Gibutyag ni SPO4 Edgar Gomez sa Danao City Police Station sa Banat News nga ang maong suspek nagbahas- bahas sa maong lugar nga nagbit-bit og armas de fuego unya giwara -wara mao rag nangita og away.

Gumikan niini nanago ang mga katawhan sa maong lugar ug mikurog sa hilabihang kahadlok sa pamasin nga kini mobuto unya masabak sila sa saag nga bala.

Sa pag-responde nila ni SPO3 Quirino Vasquez ug mga kaubanan, naabtan gyud nila ang suspek sa maong lugar nga nagbitbit pa sa iyang armas nga frontier nga dunay sulod nga usa ka buhing bala ug duha ka kabhang sa bala nga iya sa M-16 rifle.

Dihang gipangitaan kini   og mga papeles wala kini gikapakita hinungdan nga gidakop dayon kini ug gibalhug sa bilanggoan.

Gibutyag usab sa kapolisan nga nakapasalba na sa duha ka higayon ang maong suspetsado sa wala pa moabot ang grupo sa mga polis nga miresponde sa maong alarma.

Sa pagkakaron malinawon na sulod sa karsel ang maong suspek. – BANAT NEWS