CEBU – Subling gipasalig sa kagamhanan sa dakbayan sa Sugbu ngadto sa Technical Education and Skills Development (TESDA-7) nga tabangan kini sa siyudad batok sa kasong sibil nga gisang-at sa Kapitolyo aron sa pagpapahawa niini gikan sa luna nga gipanag-iya sa lalawigan.
Ang kaso gipasaka sa Kapitolyo aron pagpugos sa TESDA-7 pagpapahawa sa giukopahan niining 19,306 ka metro kwadrado nga lote nga nahimutang sa dalan Archbishop Reyes Avenue ning syudad.
Si konsehal Gerardo Carillo nakigtagbo na sa kadagkoan sa TESDA-7 ug mipasalig nga magpaluyo ang kagamhanan sa dakbayan niini diin ang mga abogado sa siyudad mao nay motubag sa madawat niining mga notisya.
Sa sayo pa gipahibawo ni acting mayor Michael Rama nga ang kagamhanan sa dakbayan modangop ug magpatabang sa Malakanyang aron kapugngan ang tinguha sa lalawigan pagpapahawa sa TESDA-7 gikan sa kasamtangang nahimutangan niini.
Daan nang gipasalig ni Mayor Tomas Osmeña ngadto sa TESDA-7 nga mohatag siya og hugot nga suporta niini batok sa tinguha sa Kapitolyo pagpalarot niini gikan sa iyang nahimutangan.
Ang mayor pinaagi sa iyang gipadangat nga text message mihagit kang Gobernador Gwen Garcia nga kun ang pagpamawi niini sa mga yuta sa probinsya gitumong para sa negosyo, gisugyot ni Osmeña nga ipabaligya og apil ang Kapitolyo unya adto sila (Garcia) magtukod og Fuente Garcia sa lungsod sa Barili uban sa bag-ong edipisyo sa Kapitolyo. – BANAT NEWS