Tawo ni Durano priso

CEBU – Nasikop sa kapolisan sa Presinto 3, sa Mandaue City Police Office ang usa ka tawo nga nagtangkil og armas de fuego nga walay lisensya ug nagpailang drayber ni 5th District Representative Red Durano niadtong miaging gabii.

Ang nadakpan mao si Ramon Enriquez Jr., 57,   minyo, nga taga dalan Almendras sa barangay Poblacion sa dakbayan sa Danao.

Si PO1 Baseledez Resurrection sa Presinto 4 sa Casuntingan Police Station nga nahinabi sa Banat News miingon nga si Enriquez ilang nakuhaan og kalibre 38 nga armas uban sa lima ka mga buhing bala niini.

Dugang pa niya nga nagsakay og motorsiklo si Enriquez dihang nahiagi kini sa checkpoint nga ilang gipahiluna sa dalan M.L. Quezon atbang sa ilang police station.

Dihang ilang gipahunong si Enriquez dali kining nagpahibalo nga may gitangkil siyang armas kay tawo siya ni Kongresista Durano.

Apan wala kini makapresentar og mga dokumento alang sa iyang armas ug maoy hinungdan nga ila kining gipaslak sa prisohan. – BANAT NEWS