Jakosalem uyon oil deregulation law ibasura

CEBU – Gisuportahan ni Cebu City Councilor Jack Jakosalem ang subling paghingusog sa pipila ka kongresista nga mabasura na ang Oil Deregulation Law gumikan sa kapakyas niini sa pagpakubos sa presyo sa mga produktong petrolyo.

Ang konsehal nga maoy chairman sa Committee on Energy and Transportation sa City Council mipadayag nga gi-cartel na ang maong mga produkto pinaagi sa mga sabot-sabot nga sinurambaw sa mga negosyante niini.

Dakong uyon si Jakosalem sa lakang ni partylist representative sa Bayan Muna Teodoro Casiño pagbanhaw sa iyang tinguha nga mapalabang na sa kongreso ang balaudnon nga mag-repeal sa nahisgutang balaud.

Kini tungod kay giingong walay nahimo ang gobyerno pagpadali sa oil price rollback taliwala sa padayong pagkunhod sa presyo sa lana sa world market.

Gani tungod sa Oil Deregulation Law ang gobyerno giingong dili makahiling sa libro sa mga oil company kung tukma ba ang gipatuman niining price rollback.

Sa nasayran, tulo ka balaudnon ang nag-ungot karon sa House Committee on Energy nga mag-regulate unya sa presyo sa mga produktong petrolyo.

Kini mao ang House Bill 3029 (An Act Regulating the Downstream Petroleum Industry and for other Related Purposes), House Bill 3030 (An Act Instituting Centralized Procurement of Petroleum in the Country) ug House Bill 3031 (An Act Renationalizing Petron Corporation). – BANAT NEWS