CEBU – Si Mayor Socrates Fernandez uban sa lima ka konsehal sa dakbayan sa Talisay gitakdang pasakaan og kiha ngadto sa Ombudsman tungod sa giingong kapakyas niini sa pagtudlo sa angayang mangulo sa pundok sa mga tiguwang sa maong dakbayan.
Si kanhi konsehal Severino Tabasa miingon nga gawas kang Mayor Fernandez, iyang ilakip pagkiha sila si konsehal Aaron Capala, Edward Alesna, Rodolfo Cabigas, Dennis Basillote ug Arturo Bas.
Matud pa ni Tabasa nga ang hinungdan ning iyang kiha mao ang kapakyas sa mayor sa pagtudlo kaniya (Tabasa) nga mangulo sa Office of the Senior Citizen Affairs (OSCA) sa Talisay nga unta siya may midaog sa pito ka tawong gipilian alang sa maong katungdanan pinaagi sa usa ka election nga gipahigayon alang niini.
Gibutyag ni Tabasa sa Banat News nga niadtong Hulyo 28, 2008 gipahigayon sa City Social Welfare Development (CSWD) ang maong election aron pilian ang pito ka mga nominee kun kinsay labing daghan og botos aron mahimong pangulo sa OSCA.
Sa maong eleksiyon si Tabasa nakakuha og 300 botos, gisundan ni Amelia Kiamko nga may 151 botos, Catalino Villegas, 139, Romeo Tabañag, 133, Ruperta Olandag, 119, Romeo Martinez, 118 ug Annie Buaya, 33.
Niadtong Agusto 5, 2008, giduso sa CSWD ngadto ni konsehal Aaron Capala, ang tsirman sa komitiba sa Senior Citizen sa konseho aron sa pagpili og tulo ka mananaog nga maoy ihandos ngadto sa mayor.
Tungod kay siya midaog, si Tabasa milaum nga siya gyuy itudlo sa mayor nga mangulo sa OSCA isip hulip kang Engr. Antonio Cervantes kansang termino sa pagkapangulo sa OSCA nabahas na niadtong Hunyo 5, 2008.
.Apan nakurat si Tabasa dihang nasayran niya nga ang gipili ni Mayor Fernandez nga OSCA head mao si Tabañag.
Maoy hinungdan nga mihiwasa ug mikisikisi si Tabasa sa kapungot, kay matud pa niya wala siya makasabot nganong si Tabañag may gipili sa mayor nga unta siya (Tabasa) mao may midaog sa election. Gumikan niini nagpanikad si Tabasa sa pagtigom sa tanang mga gikinahanglang papeles aron ikahandos niya ang kiha batok sa mayor ug kaubanan ngadto sa buhatan sa Ombudsman Visayas.
Miingon si Tabasa nga sayron niya kun unsang balaora ang gibasihan ni Fernandez sa iyang pagtudlo kang Tabañag nga unta 133 ra may botos niini itandi sa iya (Tabasa) nga 300 botos. – BANAT NEWS