CEBU – Duha ka sakop sa Anti-Robbery and Thievery Task Force (ARTAF) ang arestado karon sa kapulisan sa dakbayan sa Sugbu human aksidenteng mapusili ang buko-buko sa usa ka Koreano kinsa nagbarog sa atubangang bahin sa usa ka bikini bar diha sa Gen. Maxilom Avenue., barangay Cogon -Ramos ning dakbayan kagahapon
Ang gipangtanggong mao sila si Claudio Español Jr. 29, minyo, security guard sa BG’s Bikini Bar sakop sa Palm Kris Security Agency ug taga barangay Inayawan ning dakbayan kauban niining si Larie Gencono, 33, taxi driver, taga Sitio Laguna barangay Bulacao ning dakbayan.
Giila ang naangol mao si Jushuk Han, 30, temporaryong nagpuyo sa sitio Nasipit Talamban ug lumad nga taga Pusan, South Korea kinsa gidali pagdala sa Cebu Doctor’s Hospital.
Sa imbestigasyon nila ni SPO2 Rey Cuyos ug mga kaubanan sa Homicide Section sa Cebu City Police Office si Gencono nideposito sa iyang armas ngadto sa security guard nga si Español kinsa nag-duty sa gibantayan niining BG’s Bikini Bar.
Dihang iyaha na unta kining isulod sa drawer aksidente kining mibuto tulo ka higayon ug didto miigo sa bukobuko sa biktima kinsa mao pay paggawas sa sikbit nga Viking Bikini Bar.
Human malup-og ang biktima gidali sa pagdala sa iyang higalang Pinay ingon man Koreano sa tambalanan sakay sa usa ka taxi.
Samtang sila si Español ug Gencono ang boluntaryong nitahan sa ilang kaugalingon sa kapulisan ug kagahapong adlawa gipaubos sa paraffin test.
Narekober sa kapulisan ang armas .45 uban sa magazine niini nga adunay upat ka mga bala, tulo ka kabhang, mga deformed slug ingon man metallic fragment ug ang ID nila sa ARTAF.
Apan dihang gipangitaan og lisensya si Gencono napakyas kini sa pagpakita niini ingon man permiso sa pagdala-dala hinungdan nga pasakaan kini og kasong paglapas sa RA. 8294 kon illegal possession of firearms.
Tukmang kaso ang gi-andam sa kapulisan batok sa duha human usab ang Koreano gikatahong andam nga mopasakag kaso batok niini. – BANAT NEWS