Gipatay atbang sa tunghaan

CEBU – Usa ka minor de edad nga gituuhang sakop sa gang gipusil patay sa laing grupo sa gang sa mga batan-on niadtong Biyernes sa gabii diha sa atubangang bahin sa Tejero Elementary School, MJ Cuenco Ave. barangay Tejero, ning dakbayan.

Dead-on-arrival sa Vicente Sotto Memorial Medical Center ang usa ka 3rd year High School sa Tejero ug residente sa barangay Tinago ning dakbayan human kini makaangkon og samad pinusilan sa iyang suwang, walang dughan ug tiyan.

Ang mga suspetsado lima ka minor de edad nga nagpangidaron og 15-anyos ug 17-anyos ang nangadakpan sa kapolisan human sa hitabo.

Ang usa sa upat ka 15-anyos nga suspek ug miangkong maoy nipusil sa biktima nagtungha sa 1st year sa nahisgutang tunghaan samtang ang mga kaubanan niini pulos mga estambay.

Ang lima tungod sa ilang edad gitanggong na sa karsel sa Cebu City Police Office samtang gihikay pa ang tukmang kaso nga ipasaka human madakpi sa hot-pursuit sa operations.

Base sa report nila ni SPO2 Rey Cuyos ug mga kaubanan sa Homicide Section sa Cebu City Police Office ang biktima mao pay paggawas gikan sa gate sa maong tunghaan human mikuha sa iyang exam niadtong higayona.

Dihang nigawas na kini sa tunghaan kalit lang gipusil sa mga suspetsado tulo ka higayon ug human mahagba daling nisibat paingon sa barangay T. Padilla.

Ang mga sakop sa Mobile Patrol Group pinanguluhan ni Insp. Rex Campos ug nila ni SPO4 Joselito Palang sa Waterfront Police Station naabtan ang mga gikatahapan diha sa T. Padilla.

Narekober sa kapulisan sa crime scene ang usa ka deformed slug sa wala pa matinong armas samtang gipangita pa usab ang murder weapon nga gigamit.

Sa report sa DySS Super Radio usa ka barangay tanod nga si Serafin Britana Jr . sa barangay San Roque nagkanayon nga ang biktima magkanunayan sa ilang out post.

Matud pa niini nga dunay grupo ang maong batan-on apan sila sa mga barangay tanod sa mga nagkasikbit nga barangay diha sa Tejero niabag sa pagbantay sa maong tunghaan.

Sumala pa niini nga naatol usab nga duna silay laing gibuhat niadtong tungura tungod sa usa ka reklamo diha sulod sa maong tunghaan maong wala sila makabantay nga may giatangan na diayng tinun-an diha sa gate. – BANAT NEWS