Kapitana Patay Sa Disgrasya

CEBU - Patay ang usa ka barangay kapitana sa barangay Gaang lungsod sa Tuburan niadtong Huwebes sa alas 12:30 sa udto human nabali ang liog sa dihang nadat-ogan sa dumptruck nga gipanag-iya sa munisipyo nga nahagbong sa pangpang didto sa Sitio Kandiis, barangay Mag-antoy sa nahisgutang lungsod.

Ang namatay giila sa kapolisan nga si Kapitan Florenciana Casas,   kapitan sa barangay Gaang usa sa mga bukirang barangay sa maong lungsod nga may gilay-on nga pito ka kilometro gikan sa National Highway.

Laing naangol ang drayber nga si Ronello Martinguila, 38, casual nga kawani sa munisipyo nagdala sa dumptruck (SHW-185), naangol usab ang inahan nga si Jeniffer de Gracia, 30, mag-uuma, nagpuyo sa barangay Mag-antoy uban sa duha ka anak niini nga sila si Virgillo, 5, ug Alejandro 3.

Si SPO3 Lino delos Santos, officer in-charge sa Tuburan Police Station nga gikahinabi sa Banat News nagkanayon nga si   Casas sakay sa maong dumptruck gikan sa munisipyo paingon sa ilang barangay nga naghakot sa 20 ka sako nga semento,   bas, hollow block ug mga materyales sa construction.

Matud pa ni SPO3 delos Santos samtang nagtungas ang dumptruck sa kurbadahong karsada kalit lang napawong ang makina niini hinungdan nga nawad-an og kontrol ang drayber.

Wala na mokupot ang brake hinungdan nga naatras kini ug nahagbong ang dump truck sa pangpang nga may gilawmon nga 100 ka tiil.

“Nawad-an og brake unya naligid pa’g lima ka higayon, gawas pa naputol usab ang duha ka punoan sa lubi nga nahagbungan niini ug ang kapitan nga nauna pagkahagbong nadat-ogan, bali ang liog,” sumala pa sa polis.

Sumala pa niini ang drayber nakaangkon lang og mga samad, pangos sa iyang kalawasan human nakagakos sa manobela sa maong dump truck samtang mga pangos usab ang naangkon sa inahan ug anak nga sila si Jennifer, Virgillo ug Alejandro nga nagpaalim na karon sa Tuburan district Hospital.

Dugang pa niini nga makatulo na kahigayon nga nagbalik-balik sa maong dapit ang maong dump truck alang sa paghakot sa mga construction materials.

Dugang pa niini nga mga habal-habal driver na maoy mipahibalo kanila mga alas 4 sa hapon niadtong Huwebes human sa maong hitabo gumikan kay nabantayan niini nga adunay nahagbong didto sa awa-aw nga dapit sa barangay Mag-antoy. – BANAT NEWS