Misuway'g lugos ug nanulis gikiha

CEBU - Gipasakaan niadtong Huwebes og kasong attempted rape diha sa Talisay City Prosecutor ang usa ka 19-anyos nga lalaki kinsa gipasanginlan usab nga maoy mitulis ug midunggab sa 18-anyos nga babaye nga estudyante sa Cebu Normal University sa kursong Bachelor of Science in Psychology.

Ang maong insidente nahitabo niadtong Oktobre 9 niining tuiga sa mga alas 5:30 sa hapon diha sa barangay Jaclupan, dakbayan sa Talisay nga diin ang biktimang residente sa maong lugar kasamtangan pang giatiman sa mga doctor.

Ang suspetsado mao si Eugenio Ebonalo, residente usab sa lugar ang misurender sa kapitan sa ilang barangay aron sa paglimpiyo sa iyang pangalan.

Apan dihang gidala kini sa tambalanan diin ang biktima na-confine   positibong gitudlo si Ebonalo nga maoy mitulis ug miluba kaniya.

Matud pa sa affidavit sa biktima human siya pasakiti ug tulisa ni Ebonalo buot usab unta siyang lugoson niini apan wala niya kini masulti dayon ngadto sa polis nga nag-imbestigar sa hitabo tungod kay ang iyang nahimutangang kwarto dili pribado ug gibati siya og kauwaw dihang na-confine siya sa hospital ug kritikal ang iyang kundisyon.

Matud sa biktima nga nagtuo siyang nagkomediya lang si Ebonalo hinungdan nga mikatawa lang siya apan ang suspetsado mipakita og kutsilyo ug gition ngadto sa iyang liog ug mimando nga mosunod lang siya sa gusto niini.

Sa kahadlok misunod lang usab ang biktima ug pag-abot duol sa reservoir sa Metropolitan Cebu Water District (MCWD) diha na gihimo sa suspek ang krimen ug dihang siya misukol gihapak siya og bato ug gidunggab sa suspek ug gikuha ang iyang cellphone.

Ang dalaga nakaangkon og mga samad dinunggaban sa liog bukton, kamot, lawas ug ulo. – BANAT NEWS