Andam na sa Nov. 1, 2

CEBU - Andam na ang kagamhanan sa dakbayan sa Sugbu alang sa pag-obserbar sa Todos Los Santos ug sa adlaw sa mga kalag karong Nobiyembre 1 ug 2.

Matud ni Cebu City Acting Mayor Michael Rama nga niadtong miaging buwan pa niya gisugdan pagpatawag ang mga stakeholders sama sa kapulisan sa dakbayan, Parish Security Group (PSG), mga anti-crime group ug uban pang mga volunteer.

Giklaro hinoon sa acting mayor nga bisan kung nahan-ay na ang ilang mga plano, apan laing tigom pa gihapon ang iyang ipatawag.

Kini aron sa hingpit nga pagplantsa sa seguridad sa mga dapit sa dakbayan nga dugukan sa katawhan panahon sa kalag-kalag.

Nag-una niini mao ang mga sam-ang nga gipaabot nga hugupan sa katawhan nga moduaw sa ilang mga mahal sa kinabuhi nga nitaliwan na ngadto sa laing kalibutan.

Niingon si Rama nga laing tigom ang iyang ipatawag unya sa Huwebes sunod semana alang sa pagtino sa kaandam sa mga stakeholders.

Una nang gipahibawo sa kapulisan sa dakbayan nga andam na ang ilang implementing plan pagpatuman sa seguridad sa nagkadaiyang sam-ang sa siyudad.

Ang dakbayan dunay onse ka mga sam-ang nga naglakip sa Pardo, Labangon, Calamba, Talamban, Cempark, Lorega, Carreta, Doña Pepang, Chinese, Ludo ug Queen City. – BANAT NEWS