Budget sa inasal gamay ra

CEBU - Ang budget nga P635,000 sa milabay'ng Halad Inasal Festival sa Talisay City gamay ra kun itandi sa milabay'ng mga tuig matud ni Budget Officer Edgar Mabunay sa maong dakbayan.

Si Mabunay kinsa maoy tsirman sa maong kalihukan ning tuiga mibutyag sa Banat News nga ang nahisgutang kantidad maoy ilang naaprobahan ug gikuha kini gikan sa general fund.

Lahi sa milabay'ng tuig, ang festival karong tuiga walay gihimong solicitation tungod sa kaapiki na sa panahon sa pagpangandam.

Sa milabay'ng tuig misobra sa P1 milyon ang budget tungod kay may solicitation nga gihimo ang mga organizer busa P400,000 ray budget nga gipagawas sa syudad.

Hinuon gipaabot nila ni Mabunay nga mohatag ang kagamhanan sa probinsiya og P500,000, ug susama usab niini ang ilang gilauman gikan ni Kongresista Eduardo Gullas .

May walo ka mga dancing contingent ang misalmot sa nahisgutang Halad Inasal Festival.

Si Mabunay nagkanayon nga matag contingent gihatagan sa siyudad og P20,000 nga subsidy.

 Niining tuiga adunay mga event nga wala ipahigayon tungod kay nagdaginot ang dakbayan.

Si Mabunay midugang nga dili siya gusto nga masugamak sa utang ang siyudad hinungdan nga gipanglaslasan niya ang dili na angayan nga event. – BANAT NEWS