CEBU - Pag-ambush patay kang PO2 Jose Clint Cañete gisusi kung dunay pagkaparehas sa pattern sa pagbanhig patay kang Atty. Richard Sison niadtong bulan sa Mayo kansang kaso hangtud karon wala pa gihapon masulbad ug wala pay matumbok nga responsable.
Si Sr. Supt. Drusillo Bolodo, Deputy Regional Director for Operation sa PRO-7 ug maoy Task Force Commander sa RAIDSOTG nagkanayon nga nawad-an sila og sinaligang operatiba kung operasyon batok sa ginadiling drugas ang hisgutan.
Matud pa ni Bolodo nga wala siya magkulang sa pahimangno sa iyang mga sakop nga kanunay'ng mag-amping bisan wala sa operasyon tungod sa kasensitibo sa ilang gihawirang mga kaso.
Ang mga imbestigador sa Mandaue City Police Office dako og pagtuong may kalambigitan sa kaso sa illegal drugs ang motibo sa pagbanhig kang Cañete, usa sa mga anggulong gisubay sa pagpatay kang Sison susama gihapon niini.
Matud ni Bolodo sayo pa kaayong tawgong pareho gyud og pattern ang pag-ambush kang Cañete ug Sison tungod lang kay duha ka nagmotorsiklo ang gunmen, parehong may kalambigitan ang mga kasong illegal drugs nga ilang gihuptan ug ang pamaagi sa gunmen pagpatay.
Si Supt. Marvin Sanchez hepe sa RAIDSOTG-7 mihulagway kang Cañete nga usa ka isog nga pagkatawo bisan sa nadawat niining hulga sa kinabuhi.
Samtang si Chief Supt. Ronald Roderos mipasalig nga makadawat sa tanang benepisyo ang asawa ni Cañete lakip na ang scholarships sa mga anak niini. Kagahapon gihatagan usab ni Roderos og P10 mil ang pamilya ni Cañete gikan sa iyang kaugalingong bulsa aron dunay magamit sa pagpalubong ug uban pang gastus sa maong polis.
Nagkanayon si Roderos daghan kaayong anggulo nga ilang gitan-aw sa pagkakaron apan ang labing duol may kalambigitan sa iyang trabaho sanglit daghang drug personality ang nadakpan niini dinhi sa Central Visayas.
Samtang wala mahulga ang mga tinugyanan sa Philippine Drug Enforcement Agency (PDEA-7) sa gidangatan ni Cañete ug gihulagway sa tigpamaba sa maong ahensya batok sa illegal drugs sa pakighinabi sa Banat News nga taktika sa sindikato paghadlok kanilang mga tinugyanan sa balaod.
Pipila ka adlaw human sa pagbanhig kang Sison, gibanhigan-patay usab ang sakop sa PDEA-7 nga si FO2 Priscillano Gingoyon diha sa dakbayan sa Lapulapu.
Matud pang Tabanao bisan paman niini wala kini mangahulugang mohunong na sila sa ilang trabaho, dako sad og pagtuo ang PDEA-7 nga may kalambigitan sa illegal drugs syndicate ang mipatay kang Cañete.Gitug-an usab ni Tabanao nga bisan ang mga ordinaryong drug pusher namatikdan nila nga dunay gisandigang sindikato.
Apan bisan paman napamenusan gyud sa awtoridad ang supply sa illegal drugs pinaagi sa subsob nga mga operasyon ug dakop kun itandi sa mga nanglabay'ng katuigan. – BANAT NEWS