3 bulan mabdos gipusil-tipi

CEBU - Patay ang usa ka tulo ka buwang mabdos human kini pusila sa anak nga lalaki sa gikaaway nilang silingan sa sitio Sta. Cruz sa barangay Jagobiao, dakbayan sa Mandaue.

Ang namatay mao si Luzminda Ocaña, 40, minyo ug ang suspetsado mao si Franie Salazar, 21, pulos molupyo sa maong dapit.

Si SPO4 Ariston Bataluna sa homicide section sa Mandaue City Police Office (MCPO) nga nahinabi sa Banat News mitug-an nga naglingkod sa gawas sa ilang balay ang biktima dihang giduol sa suspetsado ug gipusil.

Nakabaton og samad sa dughan ang biktima ug gidala sa Eversely Child Sanitarium General Hospital apan gideklarar kining patay na samtang ang suspek daling miikyas.

 Apan kagahapon mitahan alas 7 pasado sa buntag ang suspek diha sa ilang buhatan human makumbinsir sa amahan niini nga si Romeo Salazar.

Si Romeo Salazar nga nahinabi sa Banat News miingon nga nagbugno ang biktima ug iyang asawa nga si Susan sa miaging mga bulan tungod sa utang nilang magtiayon nga wala nila mabayri.

Tungod sa maong insidente nag-atubang na ang iyang asawa ug ang biktima sa barangay diin sila gipabayad tungod sa mga bun-og niining naangkon ug wala siya magtuo nga nagbaton diay og pagdumot ang iyang anak.

Ang suspek gikatahong mitago ngadto sa ilang paryente sa lungsod sa Compostela apan nakumbinsir kini dihang gihangyo sa mga kabanay. – BANAT NEWS