Joavan, et.al.: not guilty

CEBU - Mi-plead not guilty ang sinagop ni Talisay City Mayor Socrates Fernandez nga si Joavan ug laing lima pa ka mga kauban niini apil na ang duha ka menor de edad atol sa gipahigayong arraignment sa kasong serious illegal detention niining giatubang sa sala ni Judge Manuel Patalingjug sa RTC branch 22 kagahapon sa buntag.

Si Joavan ug mga kauban nga sila si Benidect Gabasa, Mark Perez,Teodoro Legaray ug duha ka mga kauban niining minor de edad nga nagpangidaron og 17 ug 16 anyos mi-plead not guilty dihang gibasahan sa kasong ilang giatubang.

May labot kini sa kasong serious illegal detention nga gipasaka sa mag-agaw nga vulcanizing boys nga sila si Winston ug Osbert Abellana nga mipasangil nga gi-pick-up sila ug gipugos og dala ug gitabangan og kulata didto sa pinuy-anan ni Joavan sa Sitio Mansueto Friendlyhomes barangay Bulacao siyudad sa Talisay niadtong milabay’ng bulan.

Apan atol sa arraignment sa kaso kagahapon mi-manifest ang abogado ni Joavan nga si Atty. George Bragat nga wala sila pormal mapahibalo niini ug diha na lang sila masayod human makabasa sa lokal nga pamantalaan may labot sa gitakda nga arraignment ug gilagda dayon kini sa clerk of court.

Human mabasahi sa ilang kaso ang mga sinumbong mitakda dayon si Judge Patalingjug sa husay sa kaso karong Nobiyembre   27 sa alas 10 sa buntag. Nasayran nga si Winston Abellana ingon man ang inahan niini nga si Mercideta Abellana miduso na kini og affidavit of desistance pagsibog sa kasong serious illegal detention ingon man robbery sa habig ni Mercideta.

Apan si Osbert ingon man ang amahan niini nga si Oscar Abellana desidido gihapon sa pagpadayon og kaso ug gani mi-aplay kini karon sa witness protection program alang sa ilang seguridad human kini nakamatikod sa kapeligro sa ilang seguridad nunot sa pagpasaka nila og kaso sa sinagop sa mayor.

Nahimong kontrobersyal ang maong kaso human nabalita nga gibayran og P10 mil   si Mercideta ug gipasaligan ang iyang anak nga si Winston nga patrabahoon sa City Hall ni Mayor Fernandez bugti pagsibog sa kaso nga hugtanon usab nga gihimakak sa mayor. – BANAT NEWS