Mga 'diwata' namutol og tubo

CEBU - Napakgang karon ang operasyon sa Catmon Water and Sanitation Service Cooperative (CAWASSCO) gumikan sa tuo-tuo sa pipila ka mga molupyo sa mga engkanto ug mga diwata sa kabukiran diin nahimutang ang tinubdan sa tubig.

Kini usab ang nakaaghat sa kadagkoan sa CAWASSCO sa pagpasaka og kiha batok sa pondok sa mga “diwatahan” human nila gitumbok nga maoy namutol sa tubo gikan sa bukid aron dili na makadagayday ang tubig padulong sa pondohanan niini.

Matud pa ni Romeo Arrabis, general manager sa CAWASSCO, nga usa ka pagpakaulaw ang pamasangil sa mga diwatahan nga ang kooperatiba ang hinungdan sa pagkahugno sa yuta sa bukid gumikan sa giingong kasuko sa mga engkanto.

Ang paglihok sa yuta sa kabukiran sa barangay Panalipan ug Cabungahan sa lungsod sa Catmon nagsugod niadtong buwan sa Hulyo ning tuiga ug padayon kining nasinati sa katawhan nga namuyo sa dapit hangtod karon.

Matud pa ni Arrabis nga ilang girespetohan ang tinouhan sa ilang mga silingan apan ang dili nila madawat mao ang mga hulga nga ilang nadawat ug ang tinuyo nga pagpamuslot sa linya sa tubig.

“Kining mga klase sa tawong nagpataka lang og yubit sa CAWASSCO maoy among suspek sa mga kadaut ug karon maoy target sa among complaint,” nagkanayun si Arrabis.

Gitumbok sila si Arcadia Molleon, Julita Molleon, Rosenda Mag-usara, Sylvia Porio ug Pacita Yungco nga pulos taga barangay Panalipan nga maoy gikatakdang ipatawag ni barangay kapitan Leandrino Roilo aron patubagon sa pasangil ug sa reklamo sa CAWASSCO.

Si Santos Arenilla, usa sa tag-iya sa luna diin nahimutang ang tubod sa tubig, miasoy nga sa wala pa ang CAWASSCO, mao na gyud ang kinaiyahan sa yuta sa ilang dapit nga magsige og katumpag ug wala siya nagtoo og mga engkanto.

Matud pa ni Arenilla nga kun tinuod man ang gituohan sa iyang mga silingan nga dunay barko ilawom sa yuta, malipay siya niini aron anha nalang niya sugaton ang iyang kaigsoonan gikan sa Mindanao ug Manila ug dili na matumpawak sa pangilad sa pier sa Sugbo.

Giawhag hinoon ni Arenilla ang mga silingan nga hunungon na ang pag-ihaw og baboy alang sa mga engkanto base usab sa sugyot sa mga ameriko aron hingpit na kining manglayas sa dapit kun naa man kining mga tawhana.

Dugang pa ni Arenilla nga bisan sa iyang pagka taga-bukid, Diyos lang gayud ang hugot niyang gituohan.

Ang kadagkoan sa Department of Environment and Natural Resources nitambag na sa mga molupyo nga mobakwit sa laing lugar gumikan sa padayung paglihok sa yuta.

Ang DENR nagtuo nga gumikan sa ka daghang tubig sa lugar ang hinungdan nga humok ang yuta ug bisan asa nalang lusot ang tubig nga maoy gisalud karon sa CAWASSCO aron kini mapuslan sa katawhan. – BANAT NEWS