CEBU - Patay ang usa ka tawo human kini pusila sa duha ka wala hiilhing lalaki nga nag-bonnet sa miaging gabii didto sa sitio Kagudoy, barangay Basak, dakbayan sa Lapulapu.
Ang namatay mao si Ereneo Inso Bensi, 39 , minyo, nga taga Kagudoy.
Si SPO3 Rolito Jumao-as sa homicide section sa kapolisan sa maong dakbayan miingon nga naghigda na sa sulod sa ilang balay ang biktima dihang kalit nga miabot ang duha ka wala hiilhing mamumuno nga nagsakay og itom nga motorsiklo.
Dugang pa niya nga ang nag-angkas sa motorsiklo maoy nanaug ug misulod sa balay sa biktima ug gipusil kini sa makadaghang higayon.
Human sa maong pagpamusil ang mga kriminal misakay dayon og balik sa ilang motorsiklo ug mipabulhot kini’g padagan pahilayo sa maong dapit.
Ang biktima kinsa samdan sa nagkadaiyang bahin sa iyang lawas gihatod ngadto sa Mactan Doctor’s Hospital diin kini ideklarar nga patay na.
Si SPO3 Jumao-as miingon nga nagpadayon pa ang ilang imbistigasyon sa maong hitabo aron sa pag-ila sa mga mamumuno. – BANAT NEWS