Labyog sa Southbound padayon

CEBU - Subling nanawagan ang mga sakop sa Nampadoa (Naga,Minglanilla,Punta,Drivers and Operators Association) sa local nga kagamhanan sa Talisay, Minglanilla ug sa Land Transportation Office-7 tungod sa padayong illegal nga mga biyahe sa mga pasaheroan sa laing rota diha sa ilang dapit.

Ang maong pagpamasahero sa laing rota sa rota sa Nampadoa nakaapekto na og dako sa mga drayber nga gitagaan og prangkisa sa maong lugar.

Si Romeo Anore, bise presidente sa Nagkahiusang Drayber sa Sugbu (Nadsu) Southbound mitug-an sa Banat Manobela nga mipadangat na sila og reklamo sa mga nahisgutang local nga kagamhanan ug sa LTO-7.

Nianang madawat ang reklamo pinaagi sa suwat nga ilang gipadala dunay gihimong operasyon ang Talisay City Traffic Division ingon man ang sa Minglanilla Police ug gipangangkon nilang may mga nadakpang jeepney.

Gireklamong mga jeepney mao ang may mga rotang 10H;10F;10G ug 12L nga magarahian sa nahisgutang mga lungsod .

Matud pang Anore nga ang maong mga nahisgutang jeepney mopik-ap og pasahero diha sa dalan gikan sa ilang garahian padulong sa dakbayan sa Sugbu, mao sab kini ilang himuon inig ka gabii.

Wala hinuon kini ikasagmuyo sa mga drayber sa Nampadoa, kansang mga sakyanan pulos mga multicab apan ang pagbalik-balik sa maong mga jeepney ug magpakaaron-ingnong mogarahe sayo pa sa kahapunon hangtud sa kagabhion nakaapekto na sa kinitaan nila.

Di ikalimod nga doble ang pletihan sa mga sumasakay kun mosakay pa sila og multicab sa Nampadoa nga kutob lang sa Punta Prinsesa kumparar sa kausa ra sakay gikan sa south pabalik sa dakbayan sa Sugbu.

Apan kung basehan ang prangkisa mas dunay katungod ang Nampadoa kaysa sa mga “labyog.”

Nunot niining maong problema subling gihangyo ni Anore ang kagamhanan pinaagi dinhi sa Banat Manobela nga di lung-an ang pagpanakop sa mga labyog.

Mipasangil si Anore nga makausa ra gyud ka higayon nga nanakop ang mga polis ug LTO sa maong mga labyog dihang ila kining gierklamo niadto apan human sa usa ka adlaw’ng operasyon nahunong na kini apan namalik na usab ang mga nanglabyog.

Gihangyo ni Anore ang duha ka lungsod ingon man ang LTO-7 sa pagbutang og bisan tagsa ra ka mga traffic enforcers nga motutok sa maong reklamo sa oras sa kagabhion hangtud sa kaadlawon. – BANAT NEWS