Killers sa polis 'nailhan' na

CEBU - Nailhan na ug duna nay gidudahang mga suspetsado sa pagpusil patay kang PO2 Jose Clint Cañete niadtong Martes sa udto diha sa karaang taytayan nga nagdugtong sa duha ka dakbayan sa Mandaue ug Lapulapu habig na sa Mandaue City.

Kini maoy gibutyag ni Supt. Vicente Mersan Premne, Officer in Charge sa Mandaue City Police Office (MCPO) atol sa interview kaniya sa mga tigbalita kagahapon diha sa iyang buhatan.

Matud ni Premne nga hinayhinay sila karung nagbaktas sa pagpanguha og dugang impormasyon ug mga ebidensya nga makatabang kaayo og dako sa maong kaso.

Giangkon ni Premne nga ang pagpusil patay sa biktima dako og kalambigitan sa ginadiling drugas nga dunay gikabangga sa iyang trabaho nga usa ka drug syndicate dinhi sa Metro Cebu ug kini maoy ilang ikumpirmar nila.

Nagkanayon si Premne nga gipadad-an na diay og mga buwak ug text messages nga naghulga sa iyang kinabuhi.

Base sa nakuha nilang mga impormasyon ilang na-establisar gikan sa mga saksi nga alas 10:45 sa buntag dunay duha ka motorsiklo, usa niini enduro ug ang usa mao ang Yamaha Crypton diin dunay mga tawong pulos nag-helmet nang daan sa ilang mga nawong samtang    nag-atang nang daan sa biktima nga mogawas sa korte gikan nitambong og court hearing sa kaso sa drugas diha sa dakbayan sa Lapulapu niadtong higayona.

Gani niingon si Premne nga usa sa mga saksi nagtuong Turko nga collector ang nag-atang gawas sa korte gumikan kay nagsul-ob og crash helmet.

Dugang pang Premne nakagawas si PO2 Cañete alas 12:05 ug nideretso kini’g sakay sa iyang motorsiklo paingon dinhi sa Sugbu.

Matud ni Premne nga ilang susihon ang korte diin nitambong og hearing si PO2 Cañete sanglit giingong ang gunman nisulod pa sa korte aron pagsigurong nitambong ba gyud sa hearing ang maong polis.

Dunay pangagpas si Premne nga ang sakay sa enduro nga motorsiklo posibling maoy point finger ug back-up sa Yamaha Crypton diin sakay ang duha ka mga tawo diin ang angkas niini maoy nipusil patay ni PO2 Cañete

Apan giangkon ni Premne nga sa pagka karun wala pa gyud sila’y klarong identity sa mga suspek tungod kay pulos nag-helmet.

Gitinguha sa maong opisyal nga ma-retrieved ang CCTV nga gibutang diha sa PRO-7 tungod kay ang CCTV nga gibutang diha sa karaang taytayan gikatahong wala na mo-function.

Niadtong Martes sa gabii si Premne nakadawat og impormasyon nga posibleng dunay kalambigitan sa pagpatay sa maong polis hinungdan dali silang nipahigayon og checkpoint diha sa tiilan sa UCLM nga miresulta sa pagkasikop sa duha ka mga tawo ug nakuhaan kini og duha ka armas.

Ang nadakpan mao si Ramon Manliquez nga taga barangay Looc, Lapulapu City kinsa nagmaneho sa iyang Volkswagen nagtangag sa plaka GHZ-603 ug nakuhaan siya og usa ka .45 pistol usa ka magazine nga dunay sud pito ka buhing bala ug usa ka 38 revolver dunay tulo ka buhing bala sa tambor niini diha sa iyang sakyanan.

Samtang nadakpan si Roger Bayawa, 26, ulitawo, taga barangay Pajo, Lapulapu City human nagmaneho sa motorsiklo nga walay lisensya ug ni-expire ang rehistro sa motorsiklo.

Matud ni Premne nga nisuway unta sa pag-ikyas si Manliquez maong ilang gigukod ug nadakpan.

Ang duha ipaubos sa paraffin test ug ang armas ipaubos usab sa ballistic exam aron masuta kung wala ba makapabuto sa armas tungod sa nahitabong pagpatay kang PO2 Cañete.

Hinuon niingon si Premne dili makonsedirar nga suspek ang duha sa pagpusil patay kang Cañete. – BANAT NEWS