Prinsipal, mga titser suspensohon

CEBU - Ipasuspenso ni Cebu City Hall Education Consultant Joy Augustus Young ang prinsipal ug ang tanang magtutudlo sa Emilio Osmeña Integrated School diha sa barangay Buot-Taup.

Kini human ireklamo sa mga ginikanan ug sa mga opisyal sa nahisgutang barangay nga sayong mamuhi sa ilang mga tinun-an aron sayo nga makapauli.

Base sa reklamo nga nadawat ni Young nga sayong mamauli ang mga magtutudlo matag Biyernes ug dugay usab motunga sa matag adlaw nga Lunes.

Ang Emilio Osmeña Integrated School giingon ni Young nga dunay kapin sa napulo ka mga magtutudlo sa elementarya ug high school.

Matud ni Young nga iya nang gipahibawo ang Cebu City Schools Division sa reklamo sa mga ginikanan ug sa mga barangay officials.

Sa samang higayon girekomendar sa education consultant nga suspensuhon ang tanang mga magtutudlo sa maong tunghaan uban sa prinsipal niini.

“Kung mahimo ipa-fire out gani kay unsa may ilang commitment ana, dili himoong rason nang way sakyanan kay daghan kaayo rong habal-habal,” sumala ni Young.

Kung mahinumduman, si Young mipasuspenso usab kaniadto og mga magtutudlo diha sa barangay Sinsin ug Sudlon sa dihang usa pa siya ka konsehal sa dakbayan ug maoy chairman sa Committee on Education sa City Council.

Ang gisuspensong mga magtutudlo sa nahisgutang mga barangay giingong mamauli og sayo matag adlaw'ng Biyernes bisan pa man kun ala una pa sa kahaponon. – BANAT NEWS