Mipatay ni Sumalinog wa ilhi

CEBU - Nagpabiling blangko gihapon ang kapolisan sa pag-ila sa mibuno sa usa ka batan-ong lalaki kinsa gipusil sa duha ka wala hiilhing kriminal sa dalan Maximo Patalinjug sa barangay Pajo, dakbayan sa Lapulapu niadtong Domingo sa kaadlawon.

Si Senior Superintendent Mariano Natuil, hepe sa kapolisan sa maong dakbayan mimando sa iyang mga sakop sa pagsulbad sa maong krimen.

Si PO1 Ferdinand Michael Ceasar sa homicide section sa maong dakbayan miingon nga ang biktima nga si Jebroy James Sumalinog, 18, nga taga Sangi, Gun-ob, Lapu-lapu City naglakaw paingon sa ilang panimalay dihang kalit lang gihunongan sa usa ka motorsiklo nga gisakyan sa duha ka tawo.

Ang mga nakasaksi nagkanayon nga ang backrider sa maong motorsiklo maoy mipauwan og mga bala ngadto sa biktima nga maoy nakaingon sa hinanali niyang kamatayon.

Si PO1 Ceasar miingon nga dili pa nila matino kun naglambigit usab kini sa fraternity sanglit padayon pa nilang gitataw kun ang biktima sakop ba usab niini. – BANAT NEWS