Mama Mary moduaw sa Daanbantayan

CEBU - Bisitahon karong Huwebes ni Mama Mary ang Birhen nga nagbase sa sitio Lindogon, Simala, Sibonga, ang Parokya ni San Miguel Arkanghel sa barangay Tapilon sa lungsod sa Daanbantayan, Cebu.

Si Mama Mary magpabilin didto hangtod sa Domingo, Oktobre 26.

Inig-abot ni Mama Mary karong Huwebes may ipahigayong welcome mass sa alas 5:00 sa hapon ni Msgr. Cristobal Garcia unya mosunod ang 2nd Day Novena Mass: Our Lady of the Holy Rosary.

Inigka alas 4:30 sa kaadlawon sa Biyernes, ang ikaduhang adlaw sa pagbisita ni Mama Mary adunay Aurora (Processional route sa barangay Tapilon) unya mosunod ang Misa sa alas 5:30, ikaduhang Misa alas 9:00, ug katapusang Misa sa alas 12:00 sa udto, ug sa pagka alas 5:00 sa hapon himuon ang ikatulong Novena Mass nga pagadumalahon ni Rev. Fr. Elkigio L. Almazol Jr.

Inig ka Sabado walay kausaban sa mga kalihokan diin aduna gihapoy Aurora sa alas 4:30 sa kaadlawon (Processional route sa barangay Tapilon) mosunod ang Misa sa alas 5:00, ug alas 9:00 sa buntag hangtud na sa alas 12:00 sa udto unya sa alas 5:00 sa hapon adunay ikaupat nga Novena Mass nga pagadumalahon ni Rev. Fr. Dondon Sedillo.

Sa pagka Domingo ug katapusang adlaw sa pagbisita ni Mama Mary adunay send off, sama sa naandang Aurora sa alas 4:30 sa kaadlawon ug mosunod ang Misa alas 5:30 sa buntag ni Rev. Fr. Rossdel S. Noel.

Giawhag ang tanang mga deboto ni Mama Mary sa pagbisita ug libre ang paghawok sa mahal nga birhen sulod sa 24 oras, gani mahimong matawag ang barangay Tapilon sa telepono 437-82-09. – BANAT NEWS