Caminero Moatubang sa Ombuds

CEBU - Nipasalig si Board Member Wilfredo Caminero sa ikaduhang distrito sa lalawigan sa Sugbu nga andam siyang mokooperar sa bisan unsang imbestigasyon sa Visayas Ombudsman.

Kini human masakpi ang iyang sakyanan sa mga sakop sa Oplan Red Plate niadtong Domingo sa udto diha sa parkingan sa SM City Cebu sa North Reclamation Area ning dakbayan sa Sugbu.

Matud ni Caminero nga andam niyang atubangon tungod kay usa man kadto ka opisyal nga lakaw ang iyang tambongan human ang kauban niyang board member nga si Agnes Magpale sa ikalimang distrito nangimbitar sa usa ka kalihokan diha sa Cebu International Convention Center (CICC).

Gitug-an ni Caminero nga nigikan siya sa Argao niadtong Domingo alas 9 na sa buntag ug nakahukom siyang mohapit sa SM City aron maniudto daan usa moadto sa CICC ug ang iyang driver gibilin niya sa parkingan.

Matud niya nga duna siya’y trip ticket nga gidala-dala niadtong higayona apan nasagmuyo siya sa mga sakop sa Oplan Red Plate nga wala gyud makapaabot kaniya.

Gani nagkanayon si Caminero nga andam niyang ipakita ang trip ticket aron lang pagmatuod nga legal ang iyang lakaw, nasagmuyo si Caminero nga gi-“single out” siya sa mga sakop sa media.

Hinuon iyang gihangop ang gibuhat sa Oplan Red Plate kay daghang mga dagkong opisyal sa gobiyerno ang nigamit og sakyanan iya sa gobiyerno. – BANAT NEWS