Operation Bulak ilusad

CEBU - Nangandam na karon ang Cebu City Market Operations Division alang sa ilang ilusad nga Operation Bulak sa sunod nga semana.

Ang operation bulak mao ang pagkolekta og entrance fee sa mga bulak nga ibaligya sa merkado o dalhon sa ubang lugar sa Sugbu o sa laing probinsya.

Kini subay usab nagkaduol sa na nga Todos los Santos ug sa adlaw sa mga kalag diin halinon ang nagkadaiyang matang sa mga bulak.

Matud ni City Market Administrator Racquel Arce nga unya sa Lunes ila nang sugdan ang pagbutang og checkpoint diha sa barangay Busay.

Kini aron dili makaikyas ang tanang mutomod ug mangumpra og mga bulak sa mga bukirang barangay sa dakbayan pagbayad og entrance o market fee.

Apan giklaro ni Arce nga unya pa sa adlaw nga Martes sila magsugod og kolekta sa entrance fee ngadto sa tanang mutomod o mangumprahay og bulak.

P5 ngadto sa P200 ang kolektahon nga bayad sa market operations division magdepende lang unya sa gidaghanon sa mga bulak.

Gipadayag hinuon ni Arce nga ila nang gipasabot ang mga mag-uuma sa mga bukirang barangay nga nananom og mga bulak labot niini.

Partikular nga gitigom sa market administrator mao ang mga mag-uuma sa barangay Busay, Malubog, barangay Babag ug uban pa.

Tumong sa market administrator niini nga dili na masurpresa sa ilang lakang ang mga mag-uuma ug mobayad sa angayang bayran.

Nasayran nga gawas sa entrance fee, ang mga mag-uuma ug komprador pabayron usab og landing fee inig tugpa sa kinompra o baligya niini diha sa kamerkadohan.

Partikular na diha sa Carbon area nga maoy sagad baligyaan sa nagkadaiyang matang sa mga bulak atol sa Todos los Santos ug sa adlaw sa mga kalag. (BANAT NEWS)