CIDG may bag-ong pangulo

CEBU - Bag-ong hepe sa Criminal Investigation and Detection Group (CIDG-7) moumol og bag-ong mga sanga sa CIDG-7 sa nag-unang dakbayan dinhi sa rehiyon ingon man sa nag-unang probinsya.

Kini maoy gipahibalo ni Sr. Supt. Guillermo Lorenzo Elleazar, atol sa iyang pormal nga paglingkod isip hepe sa CIDG-7 kagahapong adlawa hulip kang Sr. Supt. Zoilo Lachica kinsa adto na sa kauluhan madestino.

Matud pa ni Elleazar sa mga sakop sa media nga iyang i-cluster ang dakbayan sa Mandaue ug Lapulapu aron adunay himoong units sa CIDG, samtang butangan usab niya’g buhatan sa CIDG ang dakbayan sa Sugbu, lalawigan sa Sugbu, Negros Oriental, Bohol, o ba kaha ang Probinsya sa Siquijor.

Hinuon iyang giklaro nga tun-an pa nila ang maong lakang tungod kay iyang nakita nga gikinahanglan nga regional office sa CIDG supervisory lang ug ang mga units maoy mo-operate.

 Subay niini iyang gipasalig sa mga sakop sa media nga aduna gyuy transparency diha sa CIDG-7 ubos sa iyang liderato.

Ug gitudlo niini isip iyang deputy director nga si Supt. Ritchie Posadas kinsa kanhi nadestino na usab sa maong buhatan duha ka tuig na ang nakalabay mao karoy gitudlong public information officer sa CIDG-7.  (BANAT NEWS)