2 gikulata, giluba, gipusil sa Akrho

CEBU - Duha ka tawo ang angol dihang gikulata, gidunggab, gispusil ug giyab-an og acido sa mga miyembro sa Alpha Kappa Rho (AKRHO) didto sa barangay Tabunok, dakbayan sa Talisay kagahapon sa kaadlawon.

Ang mga biktima giila sa mga polis nga sila si George Elmer Paculaba alyas “Jomer”, taga Fortune Plain Village ug Andrew Madaya Procalla 19, pulos taga barangay Cansojong, Talisay City.

Samtang ang mga suspetsado giila usab nga sila si Ryan Cabuenas, 23, giingong sakop sa Alpa Kappa Rho (AKRHO) nga taga sitio Anadol, barangay Lagtang, uban sa iyang mga barkada nga naila lang sa angga nga “Macky” ug “Bimby”.

Si Paculaba nahiagom sa mga samad dinunggaban sa ice pick ug bun-og sa mga kinumo ug wala masamdi og bala kay mikagar ug wala makabuto ang armas de fuego ni Cabuenas nga gipusil kaniya.

Samtang si Procalla nasunog ang kalawasan sa acido nga giyabo ngadto kaniya sa mga suspetsado.

Usa sa mga saksi nga nailhang si Alwin Lauron maoy nakapahibawo dayon sa mga polis hinungdan nga si Cabuenas kinsa naaktohan nga naghupot og .38 kalibre nga revolver maoy nasikop.

Apan ang iyang duha ka kauban kinsa mikabad og panagan wala madakpi sa mga otoridad.

Base sa imbestigasyon sa kapolisan nga ang duha ka mga biktima kauban sa ilang mga higala naglakaw didto sa Tabunok dihang kalit lamang giduol sa grupo ni Cabuenas .

Ang duha nga wala makabantay, wala makalikay dihang giliyokan kini nila ni Cabuenas ug mga kauban ug sa walay langas, gidabodabohan dayon sa kinumo ug gitusak sa ice pick si Paculaba samtang giyab-an usab og acido si Procalla.

Wala pa matagbaw gikablit ni Cabuenas ang iyang armas de fuego tumong kang Paculaba ug suwerte kay wala kini makabuto.

Gihatod dayon sa kapolisan ang duha ka biktima ngadto sa Talisay City District Hospital samtang si Cabuenas gipaslak dayon sa Talisay City Detention cell ug nagpaabot sa tukmang kaso nga isang-at batok kaniya. – BANAT NEWS