Retiradong US airman namatay

CEBU - Usa ka American national nga retiradong sakop sa US Air Force ang kalit lang namatay human gituuhang giatake sa wala pa matinong sakit sa miaging gabii sa Sacred Heart Village sa barangay Gun-ob sa dakbayan sa Lapulapu.

Ang namatay mao si Thomas Roland Bishop, 63, minyo nga lumad nga taga Florida sa Estados Unidos ug temporaryong nagpuyo sa nahisgutang dapit sa dakbayan sa Lapulapu uban sa Pilipina niining asawa.

Si PO1 Efren Lorico sa homicide section sa kapolisan sa maong dakbayan nga nahinabi sa Banat News miingon nga nagdali sa pagpangayog panabang ang asawa sa maong langyaw dihang namatikdan nga naglisod kini   og ginhawa.

Apan sa pag-abot sa mga sakop sa Emergency Rescue Unit Foundation (ERUF) ug nadala sa tambalanan wala na gihapon kini matabang ug nakabsan sa kinabuhi.

Si PO1 Lorico miingon nga ang patay’ng lawas sa namatay nga American national ang gipahiluna karon sa Rolling Hills sa Banilad, dakbayan sa Mandaue alang sa pagahimoong autopsy sa pagsuta kun unsay gikamatyan niini. – BANAT NEWS