'Rebelde' nadakpan

CEBU - Usa ka gipasanginlang lider sa rebeldeng New Peoples Army ang gidakop sa hiniusang pwersa sa Regional Intelligence Division sa Police Regional Office -7 ug sa Military Intelligence Group sa Central Command niadtong Sabado sa tungang gabii diha sa dakbayan sa Lapulapu.

Sa gipadangat nga text message ni Chief Supt. Ronald Roderos giila ang dinakpan mao si Dario Inot nga may mga alyas nga “PG,” “Allen, “Kenny” ug “David,” 48 anyos. Ang pagdakop kaniya pinasikad sa warrant of arrest nga giisyu sa Danao City Regional Trial Court Branch 25 tungod sa kasong rebelyon batok kaniya.

Si Inot gidakop diha sa may Mactan sa nahisgutang dakbayan ug gitanggong dayon ngadto sa Lapulapu Police Station samtang gikatakda kining dad-on sa korte karong adlawa.

Wala na hinuon mohatag og dugang impormasyon ang kapolisan ug militar kabahin sa iyang pagkasikop ug sa mga kasong gikalambigitan niini.

Gikatakdang hatagan unya og pasidungog ang mga sakop sa RID ug sa MIG tungod sa pagkasikop ni Inot. – BANAT NEWS