13 Ka Balay Nangaugdaw

CEBU - Trese ka balay ang nangasunog onse niini ang hingpit nga naugdaw dihang miulbo ang dakong sunog diha sa Villagonzalo sa barangay Tejero tungod sa giingong pagsiga sa usa ka electrical outlet sa usa sa mga panimalay.

Si SFO2 Felix Romero, fire scene investigator sa hitabo sa pakighinabi sa Banat News mitug-an nga nagsugod ang kalayo diha sa panimalay nga gipanag-iya ni George Alcayan nga giabangan ni May Dumanggas.

Matud pa sa katabang ni Dumanggas ngadto kang Romero ang mga anak sa iyang agalon maoy nakabantay sa kalit nga pagsiga sa bungbong, dihang iyang gitan-aw nagsiga na ang outlet nga gisaksakan sa electric fan ug sa refrigerator.

Ang kalayo dali kaayong mikatag sa gamay'ng sala hinungdan nga nanagan ang mga bata padulong sa ikaduhang andana ug silang tanan nangambak gikan sa bintana.

Lakip sa nangasunog mao ang mga panimalay sa unom ka pamilyang Lao; naapil sad ang balay nga gipanag-iya nila ni Mario Hinocor, Helen Uy, Bebe Roda, Ricardo Amores, Leonardo Basnillo, Fredo Arujado.

Gibasol sa mga bombero ang kahuot sa agianan ingon man ang mga naka-parking nga mga sakyanan nga wala dayon isibog sa mga tag-iya ingon man ang usa ka kapilyang nikaon na og luna sa kalsada.

Duha ra ka firetrucks gikan sa habig sa Arellano ug sa MJ Cuenco ang nakaduol sa fire scene tungod sa maong sitwasyon apan misumpay-sumpay pa sila og walo ngadto sa napulo ka fire hoses aron lang makaabot sa sunog ang tubig sumala pang Inspector Demetrio Baring, ang operations officer-in charge kagahapon sa Banat News.

Matud pa niya girekomendar niyang ibutang sa general alarm ang alarma gumikan kay sagad sa mga balay ginama sa light materials ug huot ang agianan.

Si Chief Insp. Victor Vibares, ang officer-in charge sa Cebu City Bureau of Fire Protection sa pakighinabi sa Banat News mibutyag nga dako og natabang pag-isa sa general alarm kay hasta ang mga sikbit nga dakbayan ug lungsod nipadala og fire trucks.

Sumala pang SFO2 Felix Romero gibana-banang P800,000 ang danyos sa sunog, nakontrolar kini human sa kapin usa ka oras nga kumbate, dunay usa ka babayeng nakuyapan tungod sa nerbiyos apan luwas na ang kahimtang. – BANAT NEWS