Di na patulgon sa Dakit ang mga residente

CEBU - Dili na tugutang anha mangatulog ang mga residente sa sitio Dakit sa barangay Guadalupe inig kagabii gumikan sa peligrong bisan unsang orasa mahimong mahitabo tungod sa pagbaha.

Kini maoy gustong mahitabo ni Cebu City Acting Mayor Michael Rama human masuta sa ocular inspection nga delikado ang kahimtang sa mga molupyo kung dunay uwan.

Ang acting mayor mipagawas gilayon og kamanduan nga anha na sa Guadalupe Gym pakatulgon ang mga molupyo matag gabii mintras tanto nga wala pay kabalhinan.

Naalarma si Rama sa iyang nakita nga mahimong mabanlas ang mga molupyo sa sitio Dakit kung dunay laing kusog nga uwan sa dakbayan.

Subay niini gisugdan gilayon pagkombinsir niadtong miaging gabii ni barangay kapitan Eugenio Faelnar ang 14 ka pamilya nga nabahaan sa nakalabay nga pag-uwan.

Apan matud sa kapitan nga kadaghanan sa apektadong mga molupyo, nagdumili pagbiya sa ilang mga balay. – BANAT NEWS