VP sa FTDOA di pabor sa recall

CEBU - Nagkabuwag ang baroganan sa presidente ug bise presidente sa Federation of Tricycle Drivers Operators Association sa dakbayan sa Talisay kabahin sa pagpa-recall ni Mayor Socrates Fernandez.

Si Mario Menyamen, bise presidente sa nahisgutang kahugpungan ug maoy presidente sa Zone 1 tricycle terminal diha sa barangay Tabunok sa pakighinabi niini sa Banat News nagkanayon nga walay kalibutan ang ilang grupo sa desisyon sa ilang presidente nga si Boy Bihag ug gani nangangha na lang sila sa pagkahibalo sa balita.

Hinoon matud niini girespeto niya ang baroganan ni Bihag apan dili sila mosuporta.

Kahinumduman nga si Bihag ang mibutyag nga mohatag og suporta ang ilang grupo sa mga drayber sa traysikol sa pagpa-recall sa mayor tungod sa pagpabadlong sa anak niini ug ang wala paghatag og tagad sa uban nilang mga yangungo.

Si Menyamen sa iyang bahin mibutyag nga si Fernandez dunay nabuhat nga kaayohan sama sa pagpausbaw sa pletihan.

Matud niini nga dili ang mayor maoy nagpabadlong kundili ang anak niining si Joavan hinungdan nga dili angayang iapil ang amahan ug gikalipay nila ang pagkabilanggo ni Joavan.

Si Menyamen midugang nga ang Zone I adunay 500 ka miyembro apan dili siya modala sa iyang mga miyembro sa iyang baroganan kabahin sa dili pagsuporta sa pagpa-recall sa mayor pasagdan lang niya ang iyang mga miyembro sa ilang desisyon. – BANAT NEWS