Neuro test sa drivers gisaway

CEBU - Dakong supak si Cebu City Councilor Sylvan Jakosalem sa plano sa Land Transportation Office (LTO) nga ilakip na sa mga rekisitos pagkuha og driver’s license (student, non-professional, professional) ang neuro test.

Ang konsehal nga maoy chairman sa Committee on Transportation sa City Council wala makakita og igong hinungdan nga kini mamahimong kabahin sa mga rekisitos.

Nahuna-hunaan ni LTO Chief Albert Suansing ang pagsukip sa neuro test sa mga rekisitos pagkuha’g driver’s license tungod sa mga aksidente sa kadalanan.

Naobserbahan ni Suansing nga ang “behavioral problem” sa mga driver maoy usa sa hinungdan pagtaas sa kaso sa mga aksidente sa kadalanan karon.

Gisusama ni Suansing ang mga sakyanan sa usa ka pusil nga kung dili magmatngon ang mga driver mahimo kining makapatay.

Nidugang ang LTO Chief nga bisan kung unsa ka luwas o road worthy ang usa ka sakyanan apan kung dunay ‘hangin’ ang utok sa driver posible gihapon ang aksidente niini.

“I think that’s useless kay diha ra man muinit ang ulo sa tawo kung pressured na, dili man na ma-detected sa neuro test,” sumala sa konsehal.

Gawas niini miingon ang konsehal nga daghan na ang rekisitos alang sa pagkuha og driver’s license ug kini dugang na usab nga galastuhan sa mga aplikante.