Machine operator sa minahan gipusil-tipi

CEBU - Usa ka operator sa minahan ang gipusil patay diha sulod sa iyang gitrabahoan sa iya ra usab nga kaubang utility worker nga giingong parolado didto sa bukirang bahin sa barangay Balaas, gibana-banang 20 ngadto sa 25 ka kilometro ang gilay-on gikan sa Poblacion lungsod sa Argao

Patay dihadiha si Danilito Amatong, 31, molupyo sa maong lugar ug operator sa usa sa mga ekipo sa minahan nga gipanag-iya ni Robert Go.

Si PO1 Rodrigo Teo sa Argao Police station nga gikahinabi sa Banat News miila sa suspek nga si Gregorio Amancio, utility worker sa maong minahan ug taga barangay Manlapay, Dalaguete.

Base sa imbestigasyon ni PO1 Teo ug mga kauban sa crime scene nagbutyag ang biktima niadtong higayona naglingkod tapad sa iyang kaubang trabahante nga si Cresencio Sumbilon samtang nag-istoryahanay silang duha.

Gikatahong sa wala pa mahitabo ang pagpamusil ang suspek dunay gikalalis nga trabahante sa minahan apan giingong nilakaw kini.

Kalit lang naabot ang suspek ug niduol sa nahimutangan sa biktima ug ni Sumbilon dayong ingon “Unsa man paliton nimo? Ug sa walay daghang istorya nibunot sa wala matinong kalibre sa armas ug gipusil ang biktima makausa ka higayon, matud pang PO1          Teo.

Ang biktima naigo sa walang tampihak ug nilapos ang bala sa tuong bahin sa ulo nga maoy nakaingon sa pagkamatay dihadiha.

Human sa hitabo ang suspek nisibat paingon sa barangay Papan ug gituuhang nilahos ngadto sa ilang pinuy-anan.

Matud ni PO1 Teo base sa ilang pakisusi walay gikaaway ang biktima sa iyang mga kaubang trabahante ug gihulagway nga buotan ug gani siya mismo (polis) nakaila kaayo sa pagkatawo sa biktima.

Ugmang adlawa o sa Martes pormal nang isang-at ang kasong murder batok sa suspek. – BANAT NEWS