Nakuryentihan sa kural patay

CEBU - Usa ka 53-anyos nga lalaki ang napalgang patay ug gituuhang nakuryentihan sa kural sa iyang pag-umangkong may nagkutay nga kuryente niadtong Biyernes diha sa barangay Colonia sa lungsod sa Tuburan.

Ang biktima giila sa kapolisan nga mao si Diosdado Bacaro residente sa maong dapit.

Ang manghod sa namatay nga si Alejandro ug Rodulfo Sayson Jr., tanod sa maong barangay maoy mitaho sa mga polis human ang asawa sa biktima maoy nakakaplag kaniya.

Sila si SPO2 Carlo Canseco ug SPO1 Gaudencio Pariel mipahigayon og ocular inspection ug nasuta nga niadtong Biyernes sa buntag nianang alas 8, ang biktima niadto sa iyang umahan dili layo sa ilang balay ug nagdaro.

Apan ang asawa nga si Consorcia nasurpresa dihang ang biktima wala mouli sa paniudto hinungdan gipangita niya kini ug diha niya makit-ing patay na duol sa kural sa iyang pag-umangkon nga ginganlan og Rolando Bacaro, 26, minyo.

Miangkon ang pag-umangkong matag gabii sugod sa alas 9 hangtud alas 7 sa buntag iyang butangan og live wire ang kural aron dili makawat iyang manok igtatari.

Niining pag-angkon ni Rolando gibalhog siya dayon sa karsel ug gipaabot nga pasakaan siya og tukmang kaso. – BANAT NEWS