Tomas na-operahan na, gi-obserbahan

CEBU - Padayon pang giobserbahan ang kahimtang sa panglawas ni Mayor Tomas Osmeña human sa malampusong operasyon kagahapong adlawa sa Massachusetts sa Estados Unidos sa Amerika.

Kini maoy gipahibawo ni Konsehal Sylvan Jakosalem sigun usab sa text message nga gipadangat sa asawa sa mayor nga si Margot ngadto kaniya.

Sa pagsuwat ning balita giingong nagpabilin pa ang mayor sa recovery room sa maong ospital.

Gioperahan ang mayor tungod sa iyang sakit nga cancer mugna usab sa nakitang bugon nga nitubo sa iyang urinary bladder o pantog.

Matud ni Jakosalem nga ang gipaabot na lang karon nilang Margot mao ang resulta sa pathology study sa tumor (bugon) nga nakuha sa pantog sa mayor.

Kini aron masayran kung unsa ang sunod nilang buhaton sibo usab sa rekomendasyon unya sa mga doktor nga nitan-aw niini.

Sa pikas bahin, gipalanog ni Jakosalem ang pagpasalamat ni Margot ngadto sa mga Sugbuanon nga nag-ampo alang sa mayor.

“Nagpasalamat si Madam Margot sa tanang nag-ampo alang kang Mayor Tommy kay naa na siya sa recovery room,” sumala ni Jakosalem.

Una nang gipahibawo sa mayor sa wala pa mogikan paingon sa Estados Unidos nga kung siya maoperahan, siya mas dali nga makabalik dinhi sa Sugbu.

Gani gikataho nga ang mayor nagplano nga motambong sa waterfront development forum nga ipahigayon sa Dubai sa United Arab Emirates unya sa Nobiyembre 15.

Apan sa dili pa kini molarga nipahibawo nga mouli una dinhi sa siyudad. – BANAT NEWS