Kapitan sa Daanbantayan kasohan

CEBU - Gipaluyohan sa Commission on Election en banc ang nahauna nga hukom sa Assistant Provincial Prosecutor sa dakbayan sa Sugbo nga angayan ipasaka ang kaso   nga kalapasan sa Omnibus Election Code batok sa kapitan sa barangay sa lungsod sa Daanbantayan.

Sa lima ka pahina nga hukom, nakita sa Comelec en banc nga adunay igong basehanan sa pagpasaka og kaso batok ni Kapitan Juanito Ybañez sa barangay Tinubdan, lungsod sa Daanbantayan.

Mipirma sa lima ka pahina nga hukom naglakip ni Chairman Jose A.R. Melo, Commissioners Reve Sarmiento, Moslemen Macarambon, Lucenito Tagla, Leonardo Leonida, Rene Sarmiento ug Nicodemo Ferrer.

Nakita sa Comelec en banc nga haum ang gipagawas nga resolusyon ni Assistant Provincial Prosecutor Mario Camomot nga mitumbok sa kalapasan ni Ybañez.

Si Engr. Augusto Corro nga maoy gideklarar nga mananaog pagka-mayor sa 2007 nga piniliay maoy misang-at og reklamo batok ni Ybañez.

Gitumbok ni Corro nga ang kapitan nga si Ybañez nakit-an nga didto sulod sa tunghaan nga nagpadayon ang ihap sa balota.

Mga dumadapig ni Corro miingon nga ang pagsulod ni Ybañez sulod sa tulonghaan bisan padayon ang botasyon usa ka dakong kalapasan.

Laing nakita sa mga nagreklamo nga si Ybañez dili botante sa lawak nga iyang gisudlan.

Isip usa ka opisyal sa barangay gidili alang kaniya ang pagsulod sa tunghaan diin nagpadayon ang botasyon.

Nahibaw-an usab nga pakyas si Ybañez pagtubag sa tanang mga pasangil kaniya sa dihang gipatawag siya sa piskaliya.

Gani nakuhaan pa man og hulagway si Ybañez nga diha sa tunghaan nga maoy gigamit sa mga mobisita sa maong lugar.

Ang kaso ni Ybañez usa sa kaso nga gibasehan usab sa protesta ni Corro ug Bise Mayor Joe de Leon batok sa kadaugan nila ni Mayor Sun Shimura ug inahan niini nga si Bise Mayor Ma. Luisa Loot.

Si Corro ug de Leon maoy gideklarar nga mananaog sa miaging 2007 nga piniliay.

Hinoon ang kampo ni Loot nakakuha og temporary restraining order sa Comelec hinungdan nga nalangan ang paglingkod nila ni Corro ug de Leon. – BANAT NEWS