Naghikog kay naglisod
CEBU - Problemang financial maoy gituohang hinungdan sa paghikog-patay sa usa ka 65-anyos nga ginang sa barangay Granada lungsod sa Boljoon niadtong Huwebes.
Ang nagpakamatay pinaagi sa paghikog ginamit ang pisi nga gihigot sa iyang liog dayon gibaat sa kahoy sa atop sulod sa ilang balay mao si Natividad Galeos Bombarda, 65, nagpuyo sa maong lugar.
Matud ni SPO4 Cristino Uraca ang officer-in-charge sa Boljoon Police dihang nahinabi sa Banat News alas 11:00 na sa buntag niadtong Huwebes nakit-an ang biktima sa iyang bana nga si Antonio Bombarda, nga nagbitay na ug nagdiwalwal ang dila sa iyang pag-abot gikan sa umahan.
Si Antonio mitug-an nga nananghid pa kini sa biktima nga moadto sa uma apan sa iyang pagpauli nakalitan nalang siya nga nagbitay na ug dunay higot sa liog nga pisi ang biktima.
Ang kalisod sa ilang pagpuyo maoy usa sa posibleng hinungdan sa pagpakamatay sa biktima human makamatikod ang mga silingan nga kanunay lang maghinuktok ang biktima ug maghisgut sa problema sa ilang kalisud sa pagpuyo. – BANAT NEWS
- Latest
- Trending
