Operasyon batok hot meat doblehon

CEBU - Doblehon na ang kalihukan sa Operation Hot Meat sa kamerkaduhan ug mga supermarket sa dakbayan sa Sugbu, nunot usab sa nagkaduol na nga Christmas season.

Kini maoy gipahibawo ni Doctor Alice Utlang, ang labaw sa Department of Veterinary Medicine and Fisheries (DVMF) sa Cebu City Hall.

Dili buot si Utlang nga dunay mga karne nga makalusot sa siyudad gikan sa kasikbit nga mga dapit nga wala moagi og inspeksyon.

Partikular na niini kadtong mga “double dead” nga mga karne nga dinhi sa dakbayan suwayan og palusot sa mga mapahimuslanong negosyante.

Sa susamang kalambuan nagplano usab karon ang City Veterinarian pagtukod og laing team nga mao unyay mo-countercheck sa ilang gipakatap nga mga inspector. Tuyo ni Utlang niini nga masigurong luwas ang mga karne nga ibaligya sa kamerkaduhan ug sa nagkadaiyang tindahan sa dakbayan.

“Dili man sa ingon nga nagduda ta sa atong mga tawo pero mas maayo man gyud nga matino nato kung husto ba gyud ni silang nag-function,” sumala ni Utlang.

“Hapit na ra bang Christmas season, mga karne ra bay sagad paliton sa mga konsumidor, mao nga atong siguruhon nga luwas atong mga karneng gipamaligya dinhi,” dugang ni Utlang.

Nipasidaan nang daan si Utlang nga dili magduha-duha ang iyang mga sakop pagsakmit sa mga karne nga masakpang ipalusot dinhi sa dakbayan.

Sa pikas bahin, ang Operation Hot Meat nakasakmit kagahapong adlawa diha sa Carbon ug pipila ka inihaw nga bisayang manok.

Niingon si Utlang nga ang walo ka manok diha lang sa Warwick Barracks giihaw hinungdan nga kini gisakmit sa iyang mga sakop.

Ang nahisgutang mga manok gipahatod gilayon sa City Veterinarian ngadto sa Cebu City Zoo ug giingong gilawog sa binuhing mga Buaya ug Tiger. – BANAT NEWS